MOENIE DAT KORTTERMYN-DENKE JOU ONTSPOOR NIE

Behou ‘n langtermyn-siening tydens wisselvallige marktoestande

Twee maande kan ‘n groot verskil maak:
Op 31 Desember 2018 was die een-jaar opbrengssyfer vir genoteerde eiendom ‘n betreurenswaardige -25.26%.

Op 28 Februarie 2019, staan die syfer egter op ’n aansienlik verbeterde -5.20%.

 

Hoe is dit moontlik dat twee maande so ’n groot verskil kan maak?
Twee dinge het gebeur:
1. Gedurende Januarie 2019 het eiendom ‘n skitterende opbrengs van 9.18% gelewer.
2. Die eenjaar-periode tot en met 28 Februarie 2019 sluit die eerste twee maande van 2018 (Januarie en Februarie), waartydens eiendom ‘n negatiewe groei van onderskeidelik -9.91% en -9.90% gelewer het, uit.

Die impak van korttermyn-denke
Die voorbeeld hierbo illustreer die impak van ‘n fokus op spesifieke beleggingstydperke, en dui daarop dat ‘n mens nie jouself moet blindstaar teen korttermyn-prestasie nie, aangesien dit binne ’n oogwink kan verander. Twee beleggers wat slegs twee maande uitmekaar belê het, kan totaal verskillende belewenisse hê. Belangriker nog, die voorbeeld beklemtoon ook die gevare daarvan om op die verkeerde tyd bates te verkoop, verliese te realiseer en dan daaropvolgende positiewe opbrengste wat op die lange duur saamgestel word, te mis.

‘n Gediversifiseerde portefeulje is belangrik
Vir die eenjaar-periode geëindig 28 Februarie 2019, het buitelandse bates die beste prestasie gelewer, hoofsaaklik bygestaan deur ‘n skerp daling in die rand wat nagenoeg 19% van sy waarde teen die dollar verloor het. Buitelandse eiendom was die bes presterende bateklas, met ‘n rand opbrengs van 36.35%, gevolg deur buitelandse aandele (20%) en buitelandse effekte (18%).
As jou beleggingsportefeulje ‘n gediversifiseerde buitelandse blootstelling gedurende hierdie tydperk gehad het, sou dit bygedra het tot prestasie en nog belangriker, dit sou ook as beskerming gedien het teen die negatiewe impak van inflasie as gevolg van die verswakking van die rand.

Kyk ons na plaaslike bates, is dit net kontant (+7.2%) en effekte (+4%) wat positiewe opbrengste oor die laaste 12 maande gelewer het, met net kontant wat inflasie oortref het. Plaaslike aandele het gedaal met 1% terwyl eiendom 5% verloor het, soos hierbo genoem.

Kontant oortref slegs op die korttermyn
Die goeie prestasie van kontant blyk ’n herhalende patroon te wees. Nadere ondersoek wys egter dat dit net van toepassing is oor kort periodes, en dat dit duidelik siklies is, soos aangedui in hierdie grafiek.

 

 

 

 

 

 

 

Beleggers begin moedeloos voel en onttrek hul beleggings in aandele ten gunste van minder riskante bateklasse (soos kontant) of verkies om glad nie te belê nie, en hulle spaargeld “veilig” weg te bêre in ‘n bankrekening. Dit kan moontlik baie gevaarlik wees, en tot ongunstige resultate op die lange duur lei.

Aandele oortref op lang termyn
Aandele oortref kontant en inflasie wel op lang termyn, soos gesien kan word in die grafiek hieronder. Indien jy belê was in aandele oor die afgelope ses jaar (wat die swak prestasie van 2018 insluit) sou jou belegging nie net inflasie nie, maar ook kontant gerieflik oortref het.

Die pryse van aandele word bepaal deur vraag en aanbod, en nie noodwendig deur hul werklike waarde nie. Somtyds word aandele oorwaardeer deur die mark, wat aandelepryse opstoot, en somtyds word dit weer onderwaardeer, wat pryse verlaag. Indien ‘n belegger aandele koop terwyl dit onderwaardeer is, skep dit ‘n geleentheid vir beleggingsgroei.

Behou jou fokus
‘n Paar maande kan inderdaad ‘n groot verskil maak, en ‘n fokus op korttermyn, statiese opbrengste kan misleidend wees. ‘n Belegger moet versigtig wees om aan te neem dat kontant se prestasie altyd dié van aandele sal oortref, aangesien uitprestasie gewoonlik siklies is, en hoe langer jy in aandele belê is, hoe hoër is die waarskynlikheid dat dit beide inflasie en kontant kan oortref.
Dit is daarom belangrik om te fokus op die langtermyn-beleggingsdoelwitte wat met behulp van jou finansiële tussenganger bepaal is en om ‘n gediversifiseerde beleggingsportefeulje te hê.

Laat weet gerus indien daar enige vrae is.

 

-Die artikel geskryf deur Glacier Investments van die Sanlam en aan Bovest gestuur om met kliente te deel.

Leave a Comment

Your email address will not be published. Required fields are marked *