Gewoontes vir Gelukkige Aftrede

Gewoontes speel ’n beslissende rol om ’n gelukkige aftrede te verseker.. Nie alle mense het gedurende hul werkende loopbaan die regte gewoontes gevorm om hul volle potensiaal as afgetredenes te kan bereik nie. Hoe kan die regte gewoontes gevorm word?

Deur die boek, “Gewoontes vir Gelukkige Aftrede” te lees, is ’n goeie beginpunt. Die boek is geskryf deur Riaan Botha en word uitgegee deur Bovest Wealth Management vir die gebruik van Bovest kliënte. Die inhoud van die boek gaan in die volgende nuusbriewe bespreek word. Hierdie boek gee erkenning aan die talle Bovest-kliënte wat oor die jare die gewoontes gevorm het om gelukkig te kan aftree. Hulle is vir ons ’n voorbeeld van mense vir wie aftrede die hoogtepunt in hul lewens is.

Aftrede is onteenseglik ’n belangrike fase in ons lewens, en waarskynlik die belangrikste. Aftrede verg beplanning en beplanning is die gevolg van goeie gewoontes.  Ons raad aan afgetredenes en mense wat beplan om af te tree, is om goeie gewoontes te kweek om hulle op die pad na ’n gelukkige aftrede te lei.

Om gelukkig af te tree is egter nie ’n gegewe nie. Jy benodig persoonlike doelwitte wat opgevolg moet word met die begeerte om die nodige regte gewoontes aan te leer. Dit vereis dikwels dat jy bereid moet wees om van jou gevestigde gewoontes te verander. In die soeke na jou persoonlike geluk gaan jou gewoontes uniek wees.